காசாவில் உயிரிழப்புகள் குறித்த அறிக்கை

கடந்த பத்து மாதங்களுக்கும் மேலாக இசுரேல் அரசு காசா மீது தாக்குதல் நடத்தி இனப்படுகொலை நடவடிக்கைகளை தொடர்ந்து  வருகிறது. அப்பாவி பொதுமக்கள், பெண்கள், குழந்தைகள் என ஆயிரக்கணக்கில் கொன்று குவித்து தனது இனவெறிக்கு இரையாக்கிக் கொண்டிருக்கிறது இசுரேல். தற்போது இசுரேலின் போர்வெறி காரணமாக பாலஸ்தீனத்தில் மருத்துவர்களும் செவிலியர்களும் எதிர்கொள்ளும் வன்கொடுமைகளை மனித உரிமைகள் கண்காணிப்பகம் (HRW) அண்மையில் அறிக்கையாக ஆகஸ்டு 26, 2024 அன்று வெளியிட்டுள்ளது.

இசுரேல் – பாலஸ்தீனத்தின் மீது தீவிரமாக தாக்குதலைத் தொடங்கிய அக்டோபர் 2023இல் இருந்து தற்போது வரை இசுரேலியப் படைகள் செய்து வரும் மனித உரிமை மீறல்கள் காணொளிகளாகவும் செய்திகளாகவும் வெளிவந்து கொண்டிருக்கின்றன. குழந்தைகள் முதல் ஊடகவியலாளர்கள் வரை கொன்று குவித்த இசுரேல் தற்போது பாலஸ்தீனிய மருத்துவப் பணியாளர்களைத் தாக்கி, அவர்களை தடுப்பு காவலில் வைத்துள்ளது. மேலும் போர் விதிமுறைகளை மீறி, மருத்துவர்களை சித்திரவதை செய்வதாக மனித உரிமைகள் கண்காணிப்பகம் அண்மையில் தெரிவித்துள்ளது.

பாலஸ்தீனத்தில் உள்ள மருத்துவமனைகள் மீது கடந்த பத்து மாதங்களில் 890 முறை இசுரேல் தாக்குதல்களை நடத்தி இருக்கிறது. அங்குள்ள 36 மருத்துவமனைகளில் 31 மருத்துவமனைகள் முற்றிலும் சேதமடைந்துள்ளன. காசாவில் உள்ள மிகப்பெரிய மருத்துவமனையான அல்-ஷிஃபா மருத்துவமனையும் இசுரேலால் குண்டுவீசி தரை மட்டமாக்கப்பட்டிருக்கிறது.

காசாவில் மீதமுள்ள மருத்துவமனைகளில் சேவையாற்றும் மருத்துவ பணியாளர்களும் கடுமையான நெருக்கடிக்கு உள்ளாகி இருக்கிறார்கள். இக்கட்டான சூழ்நிலையில் மருத்துவ சேவையாற்றிய இவர்களும் தற்போது இசுரேல் படைகளால் குறிவைக்கப்பட்டிருக்கிறார்கள்.

இசுரேலியப் படைகள் இதுவரை நடத்திய தாக்குதலில் பலியானோர் எண்ணிக்கை குறித்து ஊடகங்களும் மனித உரிமை அமைப்புகளும் வெளியிட்ட செய்திக் குறிப்பிலிருந்து கீழுள்ள அட்டவணை தொகுக்கப்பட்டுள்ளது.

இவற்றில் 50க்கும் மேற்பட்ட சுகாதார நிலையங்களும் 300 ஆம்புலன்ஸ்கள் வண்டிகளும் இசுரேல் படைகளால் திட்டமிட்டே சேதப்படுத்தப்பட்டுள்ளன. இவ்வாறு பாலஸ்தீன மருத்துவ கட்டமைப்புகளை சிதைத்தும் மக்களின் குடிநீர் ஆதாரங்களை அழித்தும் வருவதால் காசாவில் குழந்தைகளிடையே போலியோ பரவக்கூடிய ஆபத்து ஏற்பட்டுள்ளதாக மனித உரிமைகள் கண்காணிப்பகம் தெரிவித்துள்ளது.

போரினால் பாதிக்கப்பட்ட குழந்தைகளுக்கு மருந்துகளையும் தடுப்பூசிகளையும் தடை செய்யும் மனித நேயமற்ற செயலை இசுரேல் தொடர்ந்து செய்து வருகிறது. இது போன்ற நடவடிக்கைகளை இசுரேல் தொடர்ந்தால், போலியோ தடுப்பூசி தேவைப்படும் 640,000க்கும் மேற்பட்ட குழந்தைகளைக் காப்பாற்ற முடியாது என்று மனித உரிமை ஆர்வலர்கள் எச்சரிக்கைக் குரல் எழுப்புகின்றனர்.

இஸ்ரேலிய இராணுவம் பாலஸ்தீன மக்களுக்கான உணவு/ நீர் மற்றும் மருந்துகளைத் தடுப்பதை ஒரு போர்க் குற்றமாக குறிப்பிட்டுள்ளது மனித உரிமைகள் கண்காணிப்பகம். உயிர்காக்கும் மருந்துகளை காசாவுக்குள் நுழைவதைத் தடுப்பதன் மூலம் சர்வதேச நீதிமன்றத்தின் விதிகளை இசுரேல் மீறுகிறது எனவும் அந்த அமைப்பு தெரிவித்துள்ளது.

2009-இல் ஈழத்தில் நடந்த தமிழினப்படுகொலை போலவே பாலஸ்தீனத்திலும் பல மனித உரிமை மீறல்கள் நம் கண்முன்னே நிகழ்ந்து கொண்டிருக்கின்றன. ஒரு பெரும் சோகம் நிகழும் போது உடனடி போர்நிறுத்ததிற்கான நடவடிக்கைகளை முன்னெடுப்பது இன்றியமையாததாகிறது. குறைந்தபட்சம் போரினால் பாதிக்கப்பட்ட பகுதிகளில் மருத்துவ சேவைகள் முழுவீச்சில் முடுக்கி விடப்பட்டால் மட்டுமே பெருந்தொற்றுகளைத் தடுக்க முடியும். ஆனால் அத்தகைய மனித நேய முறைகள் அனைத்தையும் வழிமறித்து நிற்கிறது இசுரேலிய அரசு.