மாவீரர் நாளில் ஐயா வைகோவின் வரலாற்று  உரை – திருமுருகன் காந்தி

ராஜீவ் காந்தி காலத்தில் மோசமாகக் கையாளப்பட்ட வெளியுறவுத் துறை, இலங்கைக்கு இந்திய அரசு செய்த உதவிகள் குறித்து வெளியிட்ட புத்தகத்திற்காக தேசத்துரோக வழக்கு எதிர்கொண்ட ஐயா வைகோ, ஈழ ஆதரவிற்கு இந்தியத் தலைவர்களை சந்திக்க அவர் மேற்கொண்ட முயற்சி, 2009க்கு பிறகான ஈழ அரசியலை தமிழர் – தெலுங்கர் கதையாடலைக் கொண்டு சிதைத்த சீமான், ப.சிதம்பரம் வெளியிட்ட மூன்று தமிழர் தூக்கு விவகாரத்தை எதிர்த்த ஐயா வைகோ அவர்களின் பணி, சுயநிர்ணயக் கொள்கை குறித்தாக தெளிவான அவரின் பார்வை போன்றவைகள் குறித்து விரிவாக தோழர் திருமுருகன் காந்தி அவர்கள் முகநூலில் பதிவு செய்தவை.

நவம்பர் 27ம் தேதி சைதையில் மதிமுக நடத்திய மாவீரர் நாள் வீரவணக்கக் கூட்டத்தில் அய்யா வைகோ பல வரலாற்று நிகழ்வுகளை எடுத்துரைத்தார். கிட்டதட்ட 2 மணிநேர உரையாக விரிவான பின்னனியொடு அவரது உரை அமைந்திருந்தது.

அதில் அவர் இந்தியாவின் வெளியுறவுக் கொள்கை எவ்வாறு ராஜீவ்காந்தி காலத்தில் மிகமோசமாக கையாளப்பட்டது என்பதை நினைவுபடுத்தினார். இந்திராகாந்தி காலத்தில் இயங்கிய வெளியுறவுத்துறை செயலருக்கும், ராஜீவ் காலத்திய செயலருக்குமான வேறுபாடுகளை குறிப்பிட்டு இந்தியாவின் வெளியுறவுக் கொள்கை மிகவேகமாக, வன்மமமாக தமிழருக்கு எதிரானதாக மாற்றப்பட்டதை எடுத்துரைத்தார். குறிப்பாக இந்திராகாந்தி காலத்திய வெளியுறவுச் செயலராக இருந்த ஏ.பி.வெங்கடேஸ்வரன் ஈழத்தமிழர் குறித்து வரலாற்று புரிதலோடு செயல்பட்டதை எடுத்துரைத்தார். ஏ.பி.வெங்கடேஸ்வரன் ராஜீவ்காந்தி காலத்தில் மாற்றம் செய்யப்பட்டார். இந்திய வரலாற்றில் மிகமோசமாக நடத்தப்பட்ட ஒரே வெளியுறவுத் துறை செயலராக அவமானப்படுத்தப்பட்டார் எனும் குறிப்புகள் உண்டு. இதன் அடிப்படை காரணம் ஈழத்தமிழர் சிக்கல் குறித்த அவரது மனிதாபிமான நிலைப்பாடுகளே. பின்னர் தமிழர் விரோத நிலைப்பாடுகள் கொண்டவர்கள் இப்பதவியில் கொண்டுவரப்பட்டார்கள் .

2009 போர் இனப்படுகொலையில் முடிந்த ஓரிரு மாதத்தில், இப்படுகொலை குறித்து பெங்களூருவில் இந்திய அளவிலான மனித உரிமையாளர்கள் சந்திப்பை பி.யு.சி.எல் நடத்தியது. அதில் ஏ.பி.வெங்கடேஸ்வரன் உரையாற்றினார். தமிழர்களுக்கு இழைக்கப்பட்ட அநீதி குறித்த அவரது உரை கூர்மையானது. அச்சமயத்தில் தமிழர்களுக்கு நடந்தது இனப்படுகொலை எனும் முடிவை அவர் கொண்டிருந்தார். அதாவது பதவியை விட்டு அவர் நீக்கப்பட்டு கிட்டதட்ட 25 ஆண்டுகள் கழித்தும் அவர் நிலைப்பாடு தமிழர் சார்பாக இருந்தது. இந்த ஏ.பி.வெங்கடேஸ்வரன் காலத்தில் இந்திராகாந்தி உடன் பாராளுமன்றத்தில் 1983ம் ஆண்டு கருப்புஜூலை நிகழ்வை குறித்தும், தமிழர்களுக்கான விடுதலை குறித்தும் பாராளுமன்றத்திலும், பின்னர் அதன் தாழ்வாரத்திலும் பேசியதை நினைவுகூர்ந்து, தமிழர் சார்பாக நிலைப்பாடுகள் எடுக்கவேண்டிய அவசியத்தை வலியுறுத்தியபொழுது அதற்கு மறுப்புச் சொல்லாமல் கூர்ந்து கவனித்ததையும், இதுகுறித்து பேசுவதாக அவர் சொல்லியதை நினைவுகூர்ந்த அய்யா.வைகோ, பின் ஓரிரு மாதத்தில் இந்திரா படுகொலையான பின்னர், சூழல் மாறியதை எடுத்துரைத்தார்.

ராஜீவ்காந்தி பெரும்பான்மை பலத்துடன் ஆட்சி அமைத்த பின்னர் வெளியுறவுத்துறை மாறியது. இச்சமயத்தில் இலங்கைக்கான வெளியுறவை மேற்கொண்ட ருமேஷ்பண்டாரி எனும் நபர் சிங்கள அதிபர் ஜெயவர்த்தனாவிடம் லஞ்சம் பெற்று இலங்கைக்கு ஆதரவாக இயங்கியதை ராஜீவ் முன்னிலையில் பதிவு செய்தததை எடுத்துரைத்தார். பின்னர் அமைதிப்படை காலத்தில் ராஜீவால் மேற்கொள்ளப்பட்ட சாகச நிகழ்வுகள் எவ்வாறு மோசமாக முடிவை தமிழருக்கு அளித்ததை குறிப்பிட்டு, போர்ச்சூழலில் புலிகளின் நிலைப்பாடுகளை எடுத்துரைக்கவும், தமிழரின் ஆதரவை வெளிப்படுத்தவுமாக அமைந்த அவர் பயணம் குறித்துப் பேசியது கவனிக்கத் தக்கது. போர்ச்சூழலில் இந்தியாவின் நிலைப்பாடுகளுக்கு எதிராக இந்திய பாராளுமன்ற உறுப்பினர் நேரடியாக போராளிகளை சந்திப்பதை இந்திய ஆளும்வர்க்கம், வெளியுறவுத்துறை சகித்துக் கொள்ளாது. அதனால் அவர் தமிழ்நாட்டிற்கு திரும்பாமல் இருக்கும் வண்ணம் நடத்தப்படும் இந்திய ராணுவத்தின் கொலை தாக்குதல் குறித்து மேதகு அவர்கள் எடுத்துக்கொண்ட கவனம் குறித்துப் பேசினார். இச்சமயத்தில் தமது போராட்ட சூழலை இந்தியாவில் உள்ள பிற தலைவர்களுக்கு எடுத்துரைக்க வேண்டுமென மேதகு எழுதிய கடித்தத்தை எடுத்துக்கொண்டு தமிழகம் வந்தடைந்ததை விவரித்தார். மேதகு அவர்கள் தம் கைப்பட எழுதிய கடித்தத்தின் நகலை எடுத்து வந்திருந்தார். மணிமணியாக கோர்க்கப்பட்ட வார்த்தைகள் கொண்ட அக்கடிதத்தினை மேடையில் வாசித்தார். இந்தியாவின் சனநாயக ஆற்றல்களின் ஆதரவினை வேண்டி மேதகு அவர்கள், திமுக தலைவர் அய்யா கலைஞருக்கு எழுதிய கடிதம் அது. அக்கடிதத்தை எடுத்து வரும்பொழுது தமது கழுத்தில் சயனைடு குப்பியை கட்டி அனுப்பியதையும், அக்குப்பி மேதகு தன் கழுத்தில் அணிந்திருந்த இரண்டு குப்பிகளில் ஒன்றை எடுத்து தன் கழுத்தில் அணிவித்ததையும் எங்கள் மாநாட்டில் தெரிவித்திருந்தார் அய்யா வைகோ. அந்த சயனைடு குப்பியை தான் பாதுகாத்து வைத்திருந்ததை ஒருமுறை சொல்லி இருந்தார்.

இதன்பின்னராக இந்தியாவிற்குள் நடந்த மாற்றங்கள், தாம் எதிர்கொண்ட அடக்குமுறைகளை பதிவு செய்தார். குறிப்பாக பத்மநாபா கொலைவழக்கில் கைதுசெய்யப்பட்டு சிறையில் அடைக்கப்பட்ட தனது உடன்பிறந்த தம்பியின் சிறைப்படுத்தல் குறித்து இக்கூட்டத்தில் முதன்முதலாக அவர் பதிவு செய்ததாக நினைவு. அமைதி ஒப்பந்த காலத்தில், போர்ச்சூழலை உருவாக்க இந்திய வெளியுறவுத்துறை முயன்றதை அம்பலப்படுத்திய நிகழ்வை எடுத்துரைத்தார். குறிப்பாக புலிகளுக்கு எதிராக ராடார்களை இந்திய அரசு கொடுத்து உதவி செய்ததை ஊடகத்தில் கண்டு பிரதமரிடம் முறையிட்டு தடுக்க முயன்ற போது, வெளியுறவுத்துறை அமைச்சரை சந்திக்க சொன்னதை எடுத்துரைத்தார். அன்றைய வெளியுறவுத்துறை அமைச்சராக இருந்த நட்வர்சிங்கிடம் பேசிய பொழுது, ராடார்களை கொடுக்கவில்லை என மறுத்ததாக அவர் சொன்னதையும், ஊடகத்தில் வெளியான செய்தியை காட்டி கேள்வி எழுப்பிய பொழுதில் வெளியுறவுத்துறை சார்ந்த பெண் அதிகாரி ஒருவர், ரேடார்கள் கொடுத்தது உண்மை என தெரிவித்து நடவர்சிங்கின் பொய்யை அம்பலப்படுத்தியதை விவரித்தார். இதன் பின்னர் இந்திய அரசின் ஆயுத-ராணுவ உதவிகள் குறித்து விவரித்த அவரது புத்தகம் வெளியானது குறித்தும், இதற்காக தேசதுரோக வழக்கு ஏவப்பட்டதும் அறிந்த செய்திகள்.

பாலஸ்தீன ஆதரவு நிலைப்பாடு எடுத்து இங்கிலாந்து அரசு ராணுவ தளவாட ரீதியாக இசுரேலுக்கு செய்த உதவிகள் குறித்து லேபர்பார்ட்டியின் மூத்த தலைவர் ஜெர்மி கோர்பைன் பட்டியலிட்ட தகவல்களைப் போன்ற உழைப்பை செய்துள்ளார் அய்யா வைகோ. இந்த தகவல்கள் அடிப்படையில் இந்திய அரசை நோக்கிய கேள்வியை கூர்மைப்படுத்தி விசாரணைக் கமிசனை 2009ல் உருவாக்கியிருக்க வேண்டும். இங்கிலாந்து அரசின் இசுரேல் ஆதரவு ராணுவ உதவிகள் குறித்து விசாரிக்கும் கமிசனை, பிற பாராளுமன்ற உறுப்பினர்கள் ஆதரவோடு தற்போது ஜெர்மி கோர்பைனால் கொண்டுவர இயன்றுள்ளது. 2009ஆம் ஆண்டுக்கு பிற்பட்ட காலத்தில் இத்தகைய முயற்சிகள் எடுக்கப்பட்டது. 2009-2013ம் ஆண்டில் இந்த முயற்சிகள் கூர்மைப்பெற்றன. இச்சமயத்தில் தமிழ்நாட்டிற்குள்ளாக வாழ்வாதாரம், உரிமை சார்ந்த போராட்டங்களை நடத்தவேண்டிய சூழலை இந்திய அரசு உருவாக்கியது. இதையும் மீறி டில்லி நகரில் பல நகர்வுகள் செய்யப்பட்டன. பல மாநில கட்சிகளை சென்று சந்திக்கும் முயற்சிகள் நடந்தன. அய்யா வைகோ அவர்கள் பிற மாநில தலைவர்களை நேரில் சென்று சந்திக்கும் முயற்சிகளை மேற்கொண்டார். மம்தா பேனர்ஜி, பஞ்சாபின் அகாளிதள தலைவர்கள், காஷ்மீர் தலைவர்களை அவர் சந்தித்தார். ஈழப்படுகொலை காணொளிகளை அவர்களிடத்தில் கையளித்தார். இந்திய கம்யூனிஸ்ட் கட்சியின் மூத்த தலைவர் தோழர் டி.ராஜா அவர்களும் ஆதரவை திரட்டினார். ஈழ மக்களின் சுயநிர்ணய உரிமையை தம் கட்சி அங்கீகரிக்கும் என தோழர் டி.ராஜா, அய்யா தா.பாண்டியன் ஆகியோர் லண்டன் மாநாட்டில் அறிவித்தனர். இந்திய அளவிலான தேசிய கட்சியின் ஆதரவாக இது அமைந்தது. 2008ம் ஆண்டுகாலத்தில் கூர்மைப்பெற்ற ஈழப்போர் குறித்து டில்லியில் இந்திய கம்யூனிஸ்ட் கட்சி நடத்திய போராட்டம் குறித்து அய்யா வைகோ குறிப்பிட்டு முக்கியத்துவத்தை பேசினார்.

இதன் சமகாலத்தில் நடந்தவற்றை நான் குறிப்பிடுவது பொறுத்தமானதாக இருக்குமென எண்ணுகிறேன். 2009க்கு பின்னராக இந்திய அளவில் ஆதரவை திரட்டும் பணிகள் நடந்த சமயத்தில் தமிழ்நாட்டிற்குள்ளாக தமிழர்-தெலுங்கர் என கதைகளை கட்டும்பணியை தீவிரமாக முன்னெடுத்த கும்பல் இம்முயற்சிகளை சிதைத்தன என்பதை மே17 இயக்கம் துணிந்து ஆதாரங்களோடு எடுத்துரைக்கும். ஈழப்படுகொலை குறித்து டில்லி, மும்பை, பெங்களூர், ஹைதராபாத் என பல நகரங்களில் மே 17 இயக்கம் அக்காலத்தில் நிகழ்வுகளை நடத்தியது, ஒருங்கிணைத்தது, பங்கெடுக்கவும் செய்தது. எம்மைப்போல வெகுசில செயற்பாட்டாளர்கள் இம்முயற்சியை முன்னெடுத்தார்கள். இவர்கள் மீது அவதூறு பரப்பி சிதைக்கும் வேலையை சீமான் திறம்பட மேற்கொண்டு இம்முயற்சிகளை புறக்கணித்தார், நிராகரித்தார், மிகமுக்கியமாக இம்முயற்சிகளை தனிமைப்படுத்தினார். இவற்றையெல்லாம் மறுத்து அக்கட்சியிலிருந்து எவராது பேச விரும்பினால் நேரடியாக மே17 தோழர்களால் ஒரேமேடையில் பதிலளிக்க இயலும். இதன் உச்சமாக புலிகள் மீது விசாரணை நடத்த வேண்டுமென ஐநா தீர்மானத்தை ஆதரித்து ஊர்வலம் நடத்தினார் சீமான். இதை இக்குறிப்பில் நான் பதிவு செய்வதன் காரணம் உண்டு.

திராவிட எதிர்ப்பாளர்கள், அக்மார்க் தமிழ்த்தேசியர்களாக அறிவித்துக் கொண்டு இன்று வலம்வருகிறவர்கள் பலர் இந்திய அளவிலான முயற்சிகளுக்கு ஆதரவளிக்காதவர்கள். அச்சப்பட்டு ஒதுங்கி நின்றவர்கள். இவர்களே இன்றும் தமிழர்-தெலுங்கர் என ஒப்பாரி வைத்துக்கொண்டிருப்பவர்கள். இம்முயற்சிகளில் நான் ஈடுபட்டுக்கொண்டிருந்த சமயத்திலேயே ’இவர் தமிழரல்ல, இவர் தெலுங்கர்’ எனும் சாயம் பூசப்பட்டு பரப்பப்பட்டது. இதை செய்த கும்பலே நாம் தமிழரின் அரசியல் ஆவணத்தை 2011ல் எழுதியது. போராட்டத்திற்குள்ளாக திரிபுகளை செய்தபின் சென்னை ஊரப்பாக்கத்தில் இருந்த ஆர்.எஸ்.எஸ்சின் பிரிவாக இருந்த, இக்கும்பலின் கூடாரம் பின்னர் கலைந்துபோனது. இக்கும்பல், இவர்களோடு இன்றளவும் செயல்படும் நபர்களின் துரோகத்தனம், கோழைத்தனத்தை வாய்ப்புள்ள சமயங்களிலெல்லாம் அம்பலப்படுத்த வேண்டிய பொறுப்பு நமக்குண்டு.

ஈழத்தமிழர்கள் ஆதரவு அரசியலை இந்திய அளவில் கொண்டு செல்லவிடாமல் தடுத்ததில் பார்ப்பனர்களுக்கான பங்கு மிக அதிகம். இதற்கு நிகராக அக்மார்க் தமிழரான ப.சிதம்பரத்திற்கு உண்டு. அவர் உள்துறை அமைச்சராக 2009 காலத்தில் நடத்திய அடக்குமுறை நடவடிக்கைகள் ஏராளம். புலிகளுக்கு ஆதரவாக குரல் எழுப்பிய, ஆந்திராவின் பேராசிரியர் சாய்பாபா மீது பயங்கரவாத குற்றச்சாட்டுகளை புனைந்து சிறைப்படுத்தும் பணியை செய்தவரான (சாதி-குடிவழி அக்மார்க் தமிழரான) ப.சிதம்பரம் குறித்து, திராவிட எதிர்ப்பு தமிழ்த்தேசியர்கள் பேசுவதில்லை. பேரா.சாய்பாபா, கவிஞர் வரவரராவ் ஆகியோர் முடக்கப்படாமல் இருந்திருந்தால் ஈழ ஆதரவு அரசிய்லை இந்திய அளவில் கொண்டு செல்லும் வாய்ப்புகள் தமிழர்களுக்கு வாய்த்திருக்கும்.

ஈழ அரசியலை தமிழ்நாட்டின் தேர்தல் கட்சி சிக்கலாக முடக்கிவைத்த பெருமை சீமானுக்கும், திராவிட எதிர்ப்பு கோமாளிகளுக்கும் உண்டு. இந்திய பாராளுமன்ற உறுப்பினர்களிடத்தில் ஆதரவை திரட்டிக் கொண்டிருந்த சமயத்தில், மூன்று தமிழர் தூக்கு தண்டனையை அறிவித்தார் ப.சிதம்பரம். இந்த அறிவிப்பிற்கு முன்னதாக இப்படியாக நடந்துவிடுவதை தடுக்கும் முயற்சியில் ப.சிதம்பரத்தை அவரது அமைச்சரகத்தில் நேரடியாக சந்தித்து விளக்கம் கேட்டார் அய்யா.வைகோ. இச்சந்திப்பை முடித்து அவர் சென்னை வந்த பொழுதிலேயே அவரை விமான நிலையத்தில் நேரில் சந்தித்தேன். அச்சந்திப்பே அவருடனான முதன்முதலான நேரடியான, விரிவான உரையாடலாகவும் அமைந்தது. தூக்கு தண்டனை கொடுக்கும் முடிவு தனது அமைச்சகத்தில் இல்லை என ப.சிதம்பரம் தன்னிடம் சொன்னதாக அய்யா வைகோ சொன்னார். ஆனால் ஒரு மாதத்தில் தூக்குத்தண்டனை அறிவிப்பை ப.சிதம்பரம் டில்லி டைம்ஸ் ஆப் இந்தியா எடிசனில் வெளியிட்டார். இந்த அறிவிப்பிற்கு பின்னர், பாராளுமன்ற ஆதரவு பணி என்பது அச்சமயத்தில் மூன்று தமிழர் உயிர்காப்பு போராட்டமாக மாறியது. இதற்காக உருவாக்கப்பட்ட போராட்ட குழுவில் இணைய கோரிக்கை வைத்த போது இணைய மறுத்தார் சீமான். இக்கோரிக்கையை அவரை நேரில் சந்தித்து பேசி விவாதித்தவன் எனும் முறையில் அவரது நேர்மையற்ற அரசியலை நன்கு அறிந்தவன் நான்.

சைதை பொதுக்கூட்டத்தில் அய்யா வைகோ வாசித்த மிகமுக்கியமான மற்றுமொரு ஆவணம் கவனத்திற்குரியது. அது வட்டுக்கோட்டை தீர்மானத்திற்கு பின்பு, அமெரிக்காவின் மாசாசூசெட்ஸ் மாகாணத்தில் அதன் கவர்னரால் கொண்டுவரப்பட்ட தீர்மானம். இத்தீர்மானம் 1970களின் இறுதியில் நிறைவேற்றப்பட்டது. இத்தீர்மானத்தின்படி ஈழத்தமிழ் மக்களின் சுயநிர்ணய கோரிக்கையை அங்கீகரிக்கவும், ஈழத்தமிழர்கள் தினம் என ஒரு தினத்தை அறிவிப்பதும், அமெரிக்க அரசு தமிழர்களின் கோரிக்கையை கவனத்தில் எடுத்து நிறைவேற்ற வேண்டுமெனவும் நிறைவேற்றப்பட்டது. இந்த வரலாற்று தகவலை அந்த தீர்மானத்தின் நகலை வாசித்தும் காட்டினார் அய்யா வைகோ. தமிழர்களின் சுயநிர்ணய உரிமை என்பது அங்கீகரிக்கப்பட வேண்டியதன் முக்கியத்துவத்தை எடுத்துக்காட்டிய அய்யா வைகோ அவர்கள், தனது பாராளுமன்ற உரையின் இறுதிநாளில் தமிழ்நாட்டு தமிழர்களின் சுயநிர்ணய உரிமை குறித்து பேசியதை நினைவுபடுத்தினார்.

அவர் மேலும் பேசும் பொழுது, பாராளுமன்றத்தில் தேசிய இனங்களின் சுயநிர்ணய உரிமை குறித்து விரிவாக குரல் எழுப்பியவர் அறிஞர் அண்ணா என்பதை எடுத்துச் சொல்லி, பிற்காலத்தில் அறிஞர் அண்ணாவின் உரையில் சுயநிர்ணய கோரிக்கை குறித்த பேச்சு பாராளுமன்ற ஆவணங்களில் இருந்து நீக்கப்பட்டதையும் எடுத்துச் சொன்னார். அறிஞர் அண்ணாவின் சுயநிர்ணய உரிமை நிலைப்பாட்டை தம்முடைய உரையின் மூலமாக மீண்டும் நினைவுகூர்ந்தார். ஐ,நா வரையறுத்த அடிப்படை உரிமை சாசனத்தில் சுயநிர்ணய உரிமை முக்கியத்துவமானது என்று பதிவு செய்தார். இதிலும் மிகமுக்கியமாக சர்வதேச மனித உரிமை சாசனமான Universal declaration of Human Rights-UDHR எவ்வாறு சுயநிர்ணய உரிமையை அசைக்கவியலாத உரிமையாக நிர்ணயம் செய்கிறது என குறிப்புகளுடன் எடுத்துரைத்தார் அய்யா வைகோ. இவ்வாறாக பலவேறு வரலாற்று சூழலையும், நிகழ்வுகளையும் படம்பிடித்துக் காட்டிய உரையாக அவரது 2 மணி நேர உரை இருந்தது. சைதாப்பேட்டையில் நடைபெற்ற மதிமுகவின் மாவீரர் நாள் பொதுக்கூட்டத்தை மிக நேர்த்தியாக வடிவமைத்து பெருமளவிலான தோழர்களை திரட்டியிருந்தார் மதிமுகவின் தோழர் சைதை சுப்பிரமணி அவர்கள். மதிமுகவின் மாநில பொறுப்பாளர்களும் இயக்குனர் புகழேந்தி தங்கராசு, தற்சார்பு விவசாயிகள் சங்கத்தின் தோழர் பொன்னையன், விடுதலைத்தமிழ்ப்புலிகள் கட்சியின் தலைவர் தோழர் குடந்தை அரசன் ஆகியோருடன் மே17 இயக்கமும் பங்கெடுத்தது.

கட்சி அரசியலுக்கு அப்பாற்பட்டு தமிழினம் முன்னெடுக்க வேண்டிய கோரிக்கை ஈழதமிழர்களின் சுயநிர்ணய உரிமை. இது ஈழ தமிழர்களுக்குமட்டுமல்ல, தமிழ்நாட்டு தமிழர்கள் உட்பட பிற தேசிய இனங்களுக்கும் பொறுந்தும் என்பதை அவரது உரை எடுத்துரைத்தது. இந்த உரிமை குறித்து UDHR, பதிவு செய்வதற்கு முன்பாக UN-ICCPR charter வடிவம் பெருவதற்கு முன்பாக இந்திய பாராளுமன்றத்தில் பதிவு செய்தவர் அறிஞர் அண்ணா.

தந்தை பெரியார் மற்றும் அறிஞர் அண்ணாவின் தமிழினத்திற்கான சுயமரியாதை மிக்க சுயநிர்ணய கோரிக்கை நிலைப்பாடுகளை இன்றைய காலத்திற்கு ஏற்ப பதிவுசெய்து போராடும் ஒற்றை திராவிட கட்சியாக மதிமுக மட்டுமே இயங்குகிறது என்பதே சமகால உண்மை.